Af óheppni og ólátum

Föstudagur, 7. september 2007

Ég hef þónokkrum sinnum bloggað um óheppni mína..sem hefur verið töluverð í gegnum tíðina, enda manneskjan komin lá pappír á þrítugsaldurinn.

Óheppni mín drap á dyr síðdegis meðan undirrituð fékk sér diskóblund(blund fyrir kenderí eða aðrar skemmtanir) og verður nú greint skýrt og skilmerkilega frá.

Ég var stödd í Taikwando kennslustund í draumi og hugðist gera mitt allra besta eins og gengur og gerist. Kennarinn sem af einhverjum ástæðum leit út eins og fyrrverandi frönskukennarinn minn úr FG öskraði og æpti og hrópaði að ég þyrfti að sparka hærra og fastar sem ég og gerði..og greinilega bæði í draumnum sem í raunveruleikanum því skyndilega fann ég högg dynja á andlitinu.

Í draumnum hafði maðurinn sem leit út eins og fyrrverandi frönskukennarinn minn í FG kýlt mig í fésið því ég sparkaði ekki nógu duglega...og við það vaknaði ég.

"..Mikið var þetta raunverulegur draumur" hugsaði ég því mér leið eins og einhver hafi látið eitt gott högg gossa í andlitið á mér...þá sérstaklega vörina.

Ég reis upp mig og mína líkamsparta og sá að þungi kertastjakinn sem situr venjulega stilltur í gluggakistunni hafði dottið í rúmið...rétt við koddann minn.

Þegar ég hyggst fara fram og tjá móður minni um drauminn rekur konan upp skelfingaróp og hrópaði; "Hvað er að sjá á þér vörina barn?"

"Vörina?.." sagði ég og gekk rakleiðis að næsta spegli og við mér blasti Dettifoss af blóði og eitt stykki bólgin vör!

Þá hafði spark undirritaðrar verið svo öflugt að kertastjakinn flaug úr gluggakistunni og beint í smettið á mér...og sá til þess að varir mínar verði eins og hinar bestu Botox varir...

....og ég borgaði ekki krónu fyrir!

Flokkur: Bloggar | Breytt s.d. kl. 12:04 | Facebook